Ég ákvað að hefja gagnárás – af öllum lífs og sálar kröftum

ÞAÐ ER hreint ótrúleg saga sem Garrett Porter frá Topeka, Kansas í Bandaríkjunum hefur að segja. Þegar hann var níu ára fékk hann heilaæxli sem virtist ólæknandi. Hér var um slæmt tilfelli að ræða og læknar gáfust um síðir upp við að lækna hann og sögðu að hann gæti alls ekki lifað lengur en í hálft ár.

Örvænting
Heilaæxlið var komið á lokastig. Það var farið að hafa áhrif á jafnvægisskyn drengsins og sjóntaugar. Læknar höfðu m.a. reynt geislameðferð en heilauppskurður var talinn óframkvæmanlegur vegna legu æxlisins í heilanum.

Í örvæntingu sinni snéru foreldrar Garretts sér til hinnar þekktu Menninger-stofnunar, sem vinnur út frá sálfræðilegum hugmyndum og þeirri kenningu að fólk geti læknað sig sjálft, sé sjálfstraustið nógu mikið.

Einn læknir stofnunarinnar, Patricia Norris, tók hinn dauðsjúka Garrett í meðferð í október 1978, þegar komið var í ljós að geislameðferðin skilaði ekki árangri. Hún byrjaði þegar að kenn Garrett aðferð sem byggði m.a. á "biofeedback"-tækni (samheiti aðferða til að fylgjast með ósjálfráðri líkamsstarfsemi, t.d. með aðstoð rafeindatækja) . Þessi aðferð eflir meðvitund um ósjálfráða líkamsstarfsemi og er að þessu stefnt með það fyrir augum að ná tökum á henni – t.d. hjartslætti eða breyttum blóðþrýstingi, og jafnframt þeim geðbrigðum sem henni eru tengd.

Stjörnustríð
Í huganum sá Garrett sjúkdóm sinn fyrir sér sem "stjörnustríð" – hans eigin líkami var sérstakt sólkerfi en æxlið fjandsamleg pláneta sem reyndi að ná yfirhöndinni Garrett ímyndaði sér að hann væri sjálfur foringi flokks vopnaðra geimskipa sem réðust að árásargeimskipum fjandmannanna. Hann átti í þessu innra stjörnustríði í hálftíma á hverju kvöldi. Ástand hans hélst svipað fram í júní 1979. En í október 1979 – ári eftir að hefðbundinni meðferð var hætt – sagði Garrett dr. Norris að hann yrði ekki lengur eins áþreifanlega var við "fjandmennina" í "hugarstríði" sínu.

Hið ótrúlega hafði gerst, að heilsu Garretts hafði farið töluvert fram. Hann fékk jafnvægisskynið aftur, sjónin batnaði – og í febrúar 1980 leiddi rannsókn í ljós að æxlið í heilanum var horfið.

Garrett hefur skrifað bók um sjúkdóm sinn og hvernig honum tókst að sigrast á honum, Why me? (Hvers vegna ég?). Þar segir hann frá því hvernig hann sem barn var í mikilli óvissu um hve hættulegur sjúkdómur hans væri. Hann segist hafa verið ógurlega hræddur og angistin hafi aldrei látið hann í friði. "Eitt kvöldið þegar ég var háttaður sagði ég við sjálfan mig að ég hlyti annað hvort að gefast upp eða berjast af öllum mætti. Og ég ákvað að hefja gagnárás af öllum lífs- og sálarkröftum," segir Garrett Porter.

 Deila á Twitter