LÍFIÐ
á jörðinni stendur aldrei í
stað. Fram koma ný lífsform
og önnur hverfa af
sjónarsviðinu. Jarðsagan
geymir langa sögu þess lífs
sem frá upphafi hefur
skreytt jörðina. Saga þessi
er þó ekki samfelld þar sem
leifar lífveranna
varðveitast misvel í
jarðlögunum. Eitt af því sem
lengi hefur verið
vísindamönnum ráðgáta er
óvenju tíð framkoma nýrra
lífsforma á kambríum
tímanum. Þróun þessi var svo
hröð að í lok tímabilsins
var tilkomin sú
líkamsbygging sem enn í dag,
rúmum 500 milljón árum
síðar, einkennir flesta
hryggleysingja. Svo
merkilegt er þetta fyrirbæri
að talað er um "kambríum
sprengjuna". Nýlega hafa
þrír vísindamenn sett fram
nýja tilgátu sem skýrt gæti
þessa hraðvirku framkomu
nýrra líftegunda. Hún
byggist á tilvist frumuhóps
sem venjulega er óvirkur á
lirfustigi dýra, en gegnir
mikilvægu hlutverki í
endanlegri þróun fullvaxta
dýrs.
Það eru fyrst og fremst
hörðu hlutar líkamsleifanna,
s.s. bein og skeljar, sem
varðveitast sem
steingervingar í
jarðlögunum. Dýr sem gerð
eru nær eingöngu ur
mjúkvefjum skilja oftast
lítið eftir sig í
jarðlögunum. Það er einungis
undir sérstökum, frekar
sjaldgæfum kringumstæðum, að
mjúkir vefir dýra
varðveitist yfir
jarðsögulegan tíma. Þetta
getur hinsvegar gerst ef
dýrið grefst hratt, ef
jarðlögin eru snauð af
súrefni og þar af leiðandi
örverum og öðrum hræætum og
ef svæðið verður fyrir litlu
jarðraski. Árið 1909 rakst
bandaríski
fjölvísindamaðurinn Charles
Doolittle Walcott á
jarðlagafund sem varðveist
hafði undir þessum
kringumstæðum. Walcott fann
frábært safn vel varðveittra
lindýra frá því fyrir 570
milljón árum. Fundur þessi
sem átti eftir að hafa mikil
áhrif á hugmyndir
steingervingafræðinga sýndi
að á þessum tíma voru næstum
öll þekkt byggingarform
hryggleysingja komin fram á
sjónarsviðið. En hvaða
ferlar eða fyrirbæri voru
það sem stuðluðu að framkomu
jafn margbreytilegs lífs á
jafn skömmum tíma?
Steingervingafræðingar
rannsaka venjulega leifar
fullvaxinna lífvera,
einfaldlega vegna þess að
flestar lífverur eru
fullvaxnar þegar þær deyja.
Vísindamennirnir þrír telja
að þróun skordýralirfa sé
lykillinn að skilningi á
tilkomu fjölskrúðugra
lífforma á kambríum
tímabilinu. Flest skrápdýr,
til að mynda, þróast fyrst í
lirfur sem eru minna en einn
millimetri í þvermál.
Lirfurnar samanstanda af
nokkur þúsund frumum, sem
flestar geta ekki skipst
nema u.þ.b. 12 sinnum. Í
lirfunni eru hinsvegar
nokkrar "geymslufrumur", sem
eru óvirkar á frumstigi
dýrsins. Fullorðið dýr, sem
venjulega er ólíkt lirfunni
í útliti, þróast af þessum
geymslufrumum.
Vísindamennirnir telja að
fyrstu fjölfrumungarnir hafi
líkst lirfum skrápdýra.
Frumur þessara dýra hafa því
einungis skipst nokkrum
sinnum á æviskeiði þeirra.
Fyrstu fjölfrumungarnir hafa
því fjölgað sér og dáið áður
en geymslufrumurnar létu til
sín taka. Trúlegt er að
einhverntíma hafi
geymslufrumurnar orðið
virkar og stuðlað að myndun
nýrra lífmynstra. Þessar
frumur gátu skipt sér
langtum oftar en frumur
lirfunnar. Þær gátu einnig
flust um líkamann þegar
dýrið þróaðist og þar af
leiðandi haft mikil áhrif á
vöxt þess. Á þennan hátt
gátu geymslufrumurnar leitt
til myndunar nýrra lífvera
sem höfðu allt aðra stærð og
lögun en fyrstu
fjölfrumungarnir.
Vísindamennirnir telja að
seinna hafi þróaðri tegundir
lífvera, svo sem skordýr og
hryggdýr, sniðgengið
lirfuþróunina og þróast
eingöngu út frá
geymslufrumunum, eða
afkomendum þeirra. Þetta
hefur stóraukið möguleikana
á myndun nýrra lífforma, sem
svo mikið var um á
kambríumtímabilinu.
Hugmynd þessi er heillandi
og hún hefur þegar öðlast
marga stuðningsmenn.
Mikilvægt verkefni fyrir
þróunarfræðina er nú að
finna erfða- og
sameindafræðilega túlkun á
þeim ferlum sem um er að
ræða. Tveir hópar
vísindamanna vinna nú að
þróun líkans sem gefur
erfðafræðilega skýringu á
því sem átti sér stað í lok
kambríumtímabilsins, fyrir
rúmum 500 milljón árum.
eftir Sverrir Ólafsson
Birt á mbl.is
|