|
Sjúkdómar.
Mjög mikilvægt er að fylgjast
vel með hestinum sínum, hirða hann og fóðra, hvort sem hann er á
húsi eða úti í haga, sumar og vetur - allt árið.
Hestar geta orðið veikir eins og við og verður hér getið helstu
sjúkdóma. Hér verður fjallað um
heymæði,
hrossasótt,
helti,
múkk,
sinaskeiðabólgu,
hófsperru,
hófvandamál
og spatt.
Heymæði
Hestar geta fengið lungnabólgu. Oft kemur hún í kjölfar ofkælingar
og lungnakvefs. Það sama má segja um sjúkdóminn; heymæði. Þetta var
fremur algengur sjúkdómur í reiðhestum og brúkunarhestum en er of
algengur í hestum nú af rangri meðferð í köldum veðrum. Hestar
kvefast oft á haustin ef þeim er af vangá sleppt heitum og
svitarökum í kaldar haustnætur. Heyryk og hússtækja verka síðan
þannig á kvefið að úr verður oft ólæknandi sjúkdómur.
Aðaleinkenni heymæðinnar er andarteppa og hósti. Oftast ber lítið
sem ekkert á heymæði á sumrin. Besta ráðið gegn heymæði er að
fyrirbyggja að hestar kvefist. Alls ekki sleppa hestum heitum út í
köld veður. Ekki gefa sveittum og heitum hesti kalt vatn að drekka
fyrr en hann hefur þornað og orðinn afmóður. Til að halda heymæði í
skefjum er hægt að gefa hestum hey sem hefur legið í bleyti og hafa
þá í loftgóðum húsum.
Hrossasótt
Hrossasótt er samnafn sjúkdóma í kviðarholi hrossa. Yfirleitt er
orsökin truflanir í meltingarvegi, magaoffylli, stífla, vind- eða
krampakveisa eða garnaflækja. Orsakir hrossasóttar má oftast rekja
til snöggra breytinga á fóðrun og fóðri, t.d. þegar hestar eru
teknir á hús fyrri hluta vetrar.
Hrossasótt er mjög bráður sjúkdómur. Hesturinn hættir skyndilega að
éta, verður órólegur, slær til taglinu, krafsar með framfótum, slær
afturfótum fram undir kvið, stjáklar um, leggst og stendur á víxl og
sýnir almennt öll merki um vansæld og vanlíðan.
Við miklar kvalir getur slegið út svita á hestinum og hann fleygir
sér niður og veltir sér sitt á hvað. Á miklu ríður að ná til
dýralæknis sem fyrst. Ef maður kemur að hesti sem liggur en hefur
einkenni hrossasóttar skal reka hann strax á fætur og reyna að láta
hann hreyfa sig (gott er að teyma hann upp og niður brekku).
Batamerki er þegar loft og tað fer að ganga aftur af hestinum. Þar
til læknishjálp berst skal þess gætt að hesturinn skaði sig ekki í
verstu verkjaflogunum. Meira.
Helti
Ýmis konar helti getur orðið í hestum. Má t.d. nefna
sinaskeiðabólgu, hófsperru, mar í hóf, spatt eða máttleysi í vöðvum
eða stirðleika í liðamótum. Einnig getur steinn sem festist milli
hæls og skeifu valdið snöggri helti en lagast fljótt ef þess er gætt
að taka steininn fljótt í burtu.
Múkk
Múkk er bólga og útbrot sem kemur oft í kjúkubætur á hestum á því
tímabili sem hárskipti fara fram (hárlos á vetrum). Þetta er ekki
hættulegur sjúkdómur en getur orðið erfiður viðureignar og veldur
oft helti. Múkk lýsir sér sem hrúður af útferð úr bólginni húðinni
og svo myndast oft djúp og viðkvæm sár. Ef hestur er með múkk skal
sápuþvo sárið vel, leysa hrúðrið upp og þegar húðin er orðin þurr
skal nudda vel inní hana múkkáburði eða öðrum súlfaáburði.
Sinaskeiðabólga
Hesturinn fær stífar framfótahreyfingar, einkenni finnst ef strokið
er niður eftir leggnum aftan á fætinum þá eru sinarnar fastar við
legginn svo til. Sinaslíður eiga að vera laus frá leggnum. Hesturinn
verður að fá algera hvíld og standa á mjúku með framfætur. Hægt er
að fá áburð til lækninga og gott er að setja kalda bakstra á
sinarnar. (Teyma hestinn út í læk og láta hann standa þar í
svolítinn tíma, 5-10 mín og bera síðan á áburð).
Hófsperra
Hesturinn er stífur í hreyfingum, getur komið af eitrun eða of miklu
kraftfóðri. Hesturinn fær oft hita með. Lækning er svipuð og með
sinaskeiðabólgu en einnig gefur dýralæknir meðul og ráð.
Mar í hóf
Getur komið af steini, föstum í hóf eða höggi á hófinn. Hesturinn
verður að fá algera hvíld og einnig má nota gúmmíbotna til að hlífa
hófbotni.
Stig í hóf eða hófhvarf
Kemur oft á veturna þegar hestar eru skaflajárnaðir. Þeir geta
stigið sig sjálfir sérstaklega ungir folar óvanir járnum, og einnig
er hætta á stigi ef margir hestar eru úti saman í leik. Stig þarf
oftast að tálga upp af manni sem kunnáttu hefur til þess og bera svo
smyrsl og annað í sárið. Tjöru mun vera algengt að nota yst.
Hesturinn þarf oftast skamma hvíld eftir því hvort stigið er mikið
eða hesturinn haltur. Sprunga getur myndast af stigi og þarf að
fylgjast vel með því.
Spatt
Hækilspatt þekkist á því að hesturinn verður haltur í upphafi
hreyfingar. Spatt getur komið af of mikilli áreynslu eða meiðslum
t.d. höggi á liðinn. Spatt er kalkmyndun í brjóskskemmdinni og
beinhnúturinn sem þá myndast veldur sársaukanum og heltinni.
Spatthnúturinn finnst vanalega innan á hækilliðnum. Lækning við
spatti er uppskurður með mikilli þjálfun hestsins á eftir.
Sjá einnig greinar um
holdshnjúska
og
hitasótt.
Vitnað í
grein eftir:
Björn
Sigurðsson og Herdís Brynjólfsdóttir.
|
|
Umhirða hesta. |
|
Mikilvægt er að gera sér grein fyrir þeirri vinnu sem fylgir því að
eiga og hugsa um hest. Hér verður fjallað stuttlega um
kembingu,
járnun
og hesthús.
Gamalt spakmæli segir: Góð hirða er hálf
gjöf.
Samspil
manns og hest getur verið mjög náið. Best er að ná góðu sambandi
við hestinn s.s. með því að tala við hann, þ.e. beita röddinni,
strjúka hestinum eftir reiðtúra (gefa honum smá nudd),
kemba
honum og einstaka sinnum gefa honum brauð. Einnig ættu allir
hestamenn að leitast við að skilja hestinn og setja sig inn í
eðlileg viðbrögð hans.
Að
kemba hesti
Nauðsynlegt er að kemba hestinum vel.
Þegar kembt er, hreinsum við laus hár sem hestinn klæjar undan.
Húðin fær þannig hæfilega ertingu, sem styrkir blóðrásina. Þegar
hestinum er kembt athugum við heilsuástand hans og sjáum hvort hann
er sár á einhverjum stað. Þegar kembt er spekist hesturinn og hann
fer að treysta manninum. Rétt er að athuga að fara varlega í
nárann, sérstaklega þegar um kvumpna hesta er að ræða, því eins og
fólki, þá kitlar hesta þar.
Gott er að setja ábreiðu á hestinn
þegar hann kemur sveittur inn. Gólfkuldi og dragsúgur er hættulegur
heilsu hesta. Hitastig þarf að vera sem jafnast í hesthúsinu, 6 -
12°C, ekki hærra svo hesturinn verði ekki þvalur í hárafari.
Skeifur - járningar
Nauðsynlegt er að hafa reglulegt eftirlit með
ástandi hófa hestsins. Það þarf að fylgjast með því að hófar
haldist nægilega rakir og gæta þarf hreinlætis til að koma í veg
fyrir hófrot og
múkk.
Hestinn
þarf að járna reglulega meðan hann er notaður. Áður, meðan hross
lifðu frjáls, slitu þau hófunum eðlilega með hreyfingunni. En í dag
slíta hrossin hófum oftast of lítið í högum, en of mikið í reið og
er því nauðsynlegt að tálga hófana til að stytta þá og járna þá til
að hlífa þeim við of miklu sliti.
Járna skal reglulega á u.þ.b. átta
vikna fresti. Þá er miðað við slit, hófvöxt og réttleika fóta. Við
járningu þarf að taka tillit til væntanlegrar notkunar hestsins og
eru ýmsar aðferðir notaðar til að "hjálpa" hestinum með
gangtegundir, eftir því hvort hann er klárgengur eða skeiðlaginn.
Forðast ber að tálga/raspa hófinn að óþörfu, hlífa hófbotni og
hóftungu, og skeifustæðið á að vera algjörlega slétt. Ókostir við
járningu er m.a. að ekki er um jafnt slit að ræða, heldur snögga
breytingu við hverja járningu.
Skeifur geta týnst og járning er
fastur kostnaðarliður við hestahald. Velja þarf skeifu af hæfilegri
stærð og berja hana til svo hún passi við hófinn. Skeifur eru
valdar með sköflum þegar járnað er fyrir veturinn og stundum eru
notaðar broddfjaðrir, sérstaklega ef riðið er á ís. En á sumrin er
járnað með sléttum skeifum. Framfótaskeifur geta verið þyngri (t.d.
10 mm skeifur). Þá er verið að þyngja hestinn að framan og er það
stundum þægilegt fyrir skeiðlagna hesta, þá eiga þeir auðveldara með
brokk og tölt.
Hesthús
Misjafnt er hvenær hestar eru
teknir á hús eftir haustbeit, en flestir gefa hestum sínum nokkura
vikna frí að haustinu eða jafnvel í nokkra mánuðu. Til að hesthús
sé gott þarf að hafa góða bása eða stíur, loftræstingu, næga birtu
og gerði fyrir utan svo að hestarnir geti hreyft sig frjálst.
Skilyrði
fyrir hesta sem eru á húsi, er að þeir fái hreyfingu daglega (sé
t.d. sleppt út í gerði), gjöf reglulega á ákveðnum tímum (2 - 3
sinnum á dag) og brynningu. Þá er einnig nauðsynlegt að moka
reglulega undan þeim og sjá til að almennt hreinlæti sé í góðu lagi,
svo og að þeim sé kemmt og hófar hirtir. Æskilegt er að í
hesthúsinu sé vel loftræst og rakalaus reiðtygjageymsla.
Hesturinn er hópdýr og því ætti ekki
að hafa hesta t.d. eina á húsi, síst í ókunnu umhverfi.
Nauðsynlegt er að gefa öllum hrossum
ormalyf. Ormalyf þarf að gefa hestum þegar þeir eru teknir á hús,
en einnig er gott að gefa ormalyf þegar hestur er settur í
haustbeit.
Vitnað í
grein eftir:
Björn
Sigurðsson og Herdís Brynjólfsdóttir.
|
|
Gangtegundir íslenska
hestsins. |
|
Íslenski hesturinn hefur þann
sérstakan eiginleika að hafa fimm mismunandi
gangtegundir;
fet,
brokk,
stökk,
tölt
og
skeið.
Ekki eru þó
þessar gagntegundir eðlislægar öllum hestum og er talað um tvö
flokka hesta: alhlið hesta og klárhesta með tölti.
Alhliða hestar hafa allar fimm gangtegundirnar, fet, brokk, tölt,
stökk og skeið. Klárhestar með tölti eru hestar sem hafa allar
gangtegundirnar nema skeið. Í raun má einnig nefna tvo aðra flokka
og það eru hreinir klárhestar sem hafa grunngangtegundirnar, fet,
brokk og stökk og svo lullarar sem hafa fet, stökk og skeið. Þessir
tveir flokkar hafa ekki verið eins vinsælir reiðhestar, klárhestar
þykja reyndar oft góðir ferðahestar þar sem þægilegt er að ferðast á
þeim yfir óslétt land. Lullarar hafa oft verið notaðir sem
barnahestar en þeir fara jafnan á skeiði á hægri ferð. Skeiðið er
ekki hreint heldur einhver blanda af skeiði og tölti sem þykir hesti
til lýta. Sú hætta fylgir því ef óvaningar eru látnir ríða alhliða
hestum að lullið verði allsráðandi.
Hjá flestum
hestum er einhver ein gangtegund ríkjandi en þó eru til hestar sem
eru nokkuð jafnir á allar gangtegundir. Gangtegundir þarf að þjálfa
vel, þær eru ólíkar og gera mismunandi kröfur til knapans hvað
varðar ásetu, taumhald og hvatningu.
Fet
Fetið er jafn fjórtakta gangtegund og er sviflaus, tveir og jafnvel
þrír fætur eru samtímis á jörðu. Á fetgangi á hesturinn að ganga
slakur og frjáls, með réttum takti og lifandi fasi. Gott er að byrja
og enda reiðtúra á feti svo að hesturinn nái að sveigja sig og losa
sig við stirðleika sem getur þá bæði virkað sem upphitun og slökun
fyrir hestinn.
Brokk
Brokkið er tvítakta skástæð gangtegund, tveir fætur koma niður
samtímis. Brokk er svifgangtegund, hesturinn spyrnir t.d. með
vinstri afturfæti og hægri
framfæti og lendir á hægri afturfæti og vinstri framfæti o.s.frv.
Brokkið er léttasta gangtegundin, fyrir utan
fet, og við
sjáum að flestir hestar kjósa sér það á ósléttu landi.
Stökk
Stökk er þrítakta gangtegund með svifi. Gott er að slá þremur puttum
í borð til að heyra taktinn. Hesturinn getur ýmist stokkið upp á
hægri eða vinstri fót og er mikilvægt að þjálfa það jafnt,
sérstaklega hjá alhliða hestum því það er lykillinn að skeiðinu.
Stuttir hraðir sprettir geta haft örvandi áhrif á lata hesta og
allir hestar verða að kunna að hreyfa sig kröftuglega.
Tölt
Tölt er fjórtakta hliðarhreyfing, fjórir hófaskellir eins og fetið
og því stundum líkt við hlaupandi fetgang. Tölt er sviflaus
gangtegund, ýmist einn eða tveir fætur á jörðu í einu. Þegar hestur
töltir hækkar hann sig að framan, gefur eftir bakið, dregur sig
saman og þunginn færist meir á afturfæturna. Tölt er sérkenni
íslenska hestsins og greinir hann frá flestum öðrum hrossakynjum.
Skeið
Skeið er (nær því) tvítakta hliðarhreyfing með svifi. Skeið er
einkum riðið á stuttum sprettum með miklum hraða. Skeiðið er
tilkomumesta og vandasamasta gangtegundin sem aðeins alhliða hestar
búa yfir.
Vitnað í
grein eftir:
Björn
Sigurðsson og Herdís Brynjólfsdóttir.
|
|
Hestaævin. |
|
Þegar verið er að tala almennt um
hesta er oft
talað um hross. Karldýrið er annars kallað hestur, en kvendýrið
meri eða hryssa (ung meri). Afkvæmið kallast folald. Eins til
fjögra/fimm vetra hestar (og merar) eru trippi og ungir hestar eru
kallaðir folar. Einnig eru til fjölmörg önnur nöfn yfir hesta;
gæðingur er t.d. góður reiðhestur en bikkja og trunta er sagt um
miður góða reiðhesta. Sum nöfn koma aðalega fyrir í kveðskap, s.s.
jór, jálkur, fákur og drösull.
Hryssan
gengur með í 48 vikur, síðan kastar hún eins og sagt er. Folöldin
fæðast á sumrin og þegar rætt er um aldur hrossa er talað um hve
margra vetra þau séu. Folaldið fer strax á spena og fylgir
hryssunni næsta hálfa árið. Ekki er það algilt að folöldin séu
tekin undan mæðrum sínum, en þeir sem gera það, taka þau oftast á
hús í nóvember eða desember. Trippin þarf að fóðra vel, gefa þeim
ormalyf og sjá til þess að þau komist út undir bert loft og geti
hreyft sig daglega. Um vorið þarf að gelda folana sem ekki verða
valdir sem graðhestar.
Trippi
eru oftast látin ganga úti þangað til
tamning
hefst. Hross sem ganga úti þurfa að hafa gott skjól, þeim þarf að
gefa hey og þau verða að komast í vatn. Hvort sem hross eru úti eða
inni þurfa þau gott eftirlit og umhirðu.
Mörgum
þykir æskilegt að trippi hafi vanist umgengni við fólk áður en
eiginleg tamning hefst, sem oftast er á 4. vetri. Ekki borgar sig
að fara of geyst af stað við
tamningu, því
ekki má ofgera ungum hestum. Eftir því sem hesturinn eldist má auka
brúkun hans og
þjálfun.
Hestar geta orðið nokkuð gamlir, jafnvel yfir 30 vetra, en
venjulega er þeim fargað áður en þeir ná svo hárri elli. Hestar
geta verið vel brúklegir til 25/27 vetra aldurs.
Vitnað í
grein eftir:
Björn
Sigurðsson og Herdís Brynjólfsdóttir.
|
|
Þarfast þjónninn. |
|
Um aldir var hesturinn þarfasti þjónninn en
með tilkomu bílsins og véla um miðja 20. öldina,
breyttist hlutverk
hans. Hesturinn losnaði undan því
erfiða hlutverki
að vera vinnudýr og varð þess í stað tómstundagaman. Skipulögð
hrossarækt efldist í kjölfarð og meiri áhersla var lögð á
ganghæfileika og byggingu hesta en áður. Hestamannafélög spruttu upp
og farið var að halda
hestamannamót.
Í dag skapar hesturinn mörgum atvinnu og tekjur, m.a. þeim sem
flytja út
hesta.
Hesturinn sem vinnu- og samgöngutæki
Hesturinn hefur oft verið nefndur þarfasti þjónninn og bar
hann það svo sannarlega með réttu þar til bíllinn kom til sögunnar.
Án hestsins hefði Ísland eflaust verið óbyggilegt.
Ísland
er erfitt yfirferðar og íslendingar urðu að treysta á hestinn.
Íslenski hesturinn hefur frá upphafi byggðar lifað í nánu sambandi
við þjóðina og verið ómissandi í samgöngu og atvinnumálum. Varla var
til það verk sem maður og hestur fylgdust ekki að s.s. bera hey af
túni og engi, reka fé af fjalli að vori og smala að hausti, draga
trjávið til bygginga, fisk úr verstöðum, hitta nágranna á bæjum,
ríða til hofs eða kirkju. Öll landbúnaðarstörf voru unnin með
hestum og fyrsta upplifun margra var að fá að sitja dráttarhestinn.
Landið var
torvelt yfirferðar og oft var ferðin löng frá einum stað til annars.
Ferðir þvert og endilangt á hestbaki eru alkunnar framan úr fornöld
til okkar daga. Allur flutningur fór fram á hestum s.s.
heyflutningur, skreiðflutningur, trjádráttur, búferlaflutningur,
hvalflutningar og svona mætti lengi áfram telja. Þessar ferðir voru
oft farnar í lestum.
Mánaðarmótin
júní- júlí var tími helstu lestarferða. Þá komu lestirnar úr
sveitunum til að sækja vertíðaraflann til verstöðvanna. Oftast var
hnýtt upp á hvern klyfjahest og þeir síðan bundnir í taglið hvern á
eftir öðrum og aðeins sá fremsti teymdur. Þessar ferðir tóku oft
margar vikur og jafnvel mánuði og til að sem greiðlegast gengi voru
hestarnir oft mjög margir. Ekkert af þessu var framkvæmanlegt án
þarfasta þjónsins.
Hjólið kom
síðar til Íslands en nokkurs annars Evrópulands. Það var einkum
vegna þess hve landið var slæmt yfirferðar og hestarnir góðir.
Fyrsti hestvagninn kom ekki til Íslands fyrr en 1880 eða rúmlega
tuttugu árum áður en fyrsti bíllinn. Hestvögnum fjölgaði svo
eitthvað en urðu aldrei vinsælir einkum vegna þess að nær einungis
var hægt að aka þeim í kaupstöðum eða þar sem vegir voru.
Bílar
og vélar fara að koma hingað til lands í kringum 1950 og leysa
hestinn smám saman af hólmi í samgöngu og atvinnumálum. Þá þótti
skyndilega fínt að eiga bíl þó vissara gæti verið að hafa með sér
hesta til þess að draga hann upp úr ám og vötnum. Í bæjum tók
bíllinn við af vagnhestinum, póstvagnarnir hurfu, síðan komu
langferðarbílar og loks traktorar. Eftir það fór hlutverk hestsins
að breytast, frá því erfiða hlutverki sem hann mátti oft þola frá
upphafi tilveru sinnar í landinu, til leiks og tómstundargamans
fyrir almenning.
Hesturinn
var þó ekki bara vinnudýr heldur líka félagi og vinur sem oft var
ort lof í ljóði, sagðar af frægðarsögur, og söngvar í taktslætti
hófaglammsins. Góður hestur var líka stöðutákn, mannvirðing bónda
var hesturinn, bær og bústofn. Gæðingurinn var notaður til
skemmtunar, útreiða eða til kirkjuferðar þar sem menn sýndu sig og
sáu aðra.
Áður
fyrr var það draumur flestra barna að eignast góðan hest og
reiðtygi. Draumurinn rættist oft fyrr hjá strákunum því þeir fengu
hærri laun greidd fyrir útivinnu sína en stúlkur fyrir innistörfin.
Ef börn komu af ríkum fjölskyldum fengu þau stundum hesta gefins og
þá jafnt strákar sem stelpur.
Breytt
hlutverk hestsins
Félög
hestamanna voru stofnuð og hestamannamót haldin. Farið var að
stunda markvissari kynbætur, m.a. með meira tilliti til
ganghæfileika og byggingu hrossa en áður var. Til eru þó eldri dæmi
um eflingu í hrossarækt sem dæmi má nefna greinagerð frá Skagafirði
1879, en þar segir m.a.: "Skal við slíkt taka til greina lipurð,
ganglag, fjör, hörku, þol, krafta, holdafar, stærð, vaxtarlag,
fríðleik, háralag, hárprýði og hófagerð".
Á þessu sést að menn voru farnir að huga að ganghæfni en af eldri
heimildum virðist sem lítið hafi verið lagt upp úr því heldur
aðallega vilja og fegurð.
Í dag eru mörg
ræktunarbú á
landinu. Eitt af markmiðum ræktunarinnar er að efla og viðhalda
sérkennum íslenska hestsins.
Útflutningur á hestum
Íslenski hesturinn hefur einnig notið mikilla vinsælda erlendis og
eru árlega fluttir tugir hesta út. Erlendir hestamenn eru einnig
farnir að rækta íslenska hesta þannig að margir íslenskir hestar
hafa aldrei komið til Íslands.
Á söguöld voru fluttir út vígahestar
og einhverjir voru gefnir höfðingjum (kónginum).
Á 19. öld var útflutningur á vinnuhestum, en síðar á reiðhestum. Á
heimstyrjaldar árunum var nánast enginn útflutningur á hestum en
síðan eftir 1960 hefur mikið verið flutt út. Mikið hefur verið selt
til Þýskalands, nokkuð Norðurlandanna og fleiri landa. Nýjasti
markaðurinn fyrir íslenska hesta er í Norður-Ameríku.
Á Íslandi er
talið að séu um 80.000 hross (2000) og eru þau einkum notuð sem
reiðhross. Hestamennska er vinsæl íþrótt á Íslandi og fjölgar þeim
stöðugt sem taka hana upp sem áhugamál. Flestir hestaunnendur vilja
bæta og efla íslenska hestinn, eiga hann að vini um leið og njóta
kosta hans hvort heldur er í sveit eða bæ. Magir bændur eiga hesta
og sumir afla sér talsverðra tekna með hrossarækt, þjálfun
reiðhesta. eða hestaleigu.
|
|
Uppruni hesta |
|
Hesturinn á sína
þróunarsögu
rétt eins og maðurinn. Hann er talinn eiga uppruna sinn að rekja
til dýrs sem lifði í Ameríku fyrir 75 milljónum ára. Þetta dýr
var álíka stórt og meðalhundur með fjórar fætur og fimm tær á
hverjum fæti. Með tímanum breyttist umhverfið, frumskógar urðu
að gresjum og jarðvegur var ekki eins blautur og áður. Í
kjölfarið þurftu dýr að aðlaga sig að breyttu umhverfi. Þetta
áðurnefnda dýr þurfti ekki lengur á fimm tám að halda til að
komast um blautlendi og fækkaði þeim smám saman og að lokum var
aðeins ein tá eftir eða hófur. Tennur urðu sterkari og hálsinn
lengdist til að hann næði betur til jarðar. Á gresjunum voru dýr
berskjaldaðri gagnvart rándýrum en í frumskógunum. Eitt af
varnarkerfum var að staða augnanna breyttist svo þau sáu betur
allan hringinn og rándýr komu síður á óvart.
Fyrir
milljón árum er talið að hesturinn hafi svo verið búinn að fá á
sig það útlit sem við þekkjum hann á í dag.
Hestategundum mátti skipta í þrjá meginflokka:
Segja má
að þeir síðast töldu hafi orðið grundvöllur hestakynja í
heiminum. Nokkrar undirtegundir voru einnig til bæði úr flokki
smáhesta og venjulegra hesta.
Hesturinn
lifði villtur og litu menn á hann sem hvert annað veiðidýr þar
til fyrir um 6000 þúsund árum þegar fyrstu mennirnir fóru að
temja þá en þá voru menn löngu farnir að temja hunda, kindur og
hreindýr.
Hirðingjar í Asíu sem flökkuðu um í hópum á milli svæða eru
taldir fyrstir til að temja hesta. Þeir byrjuðu á að flytja
búslóðina á hestunum og beita þeim fyrir tvíhjólavagna. Síðan
fóru þeir að nota hestinn til reiðar sem gerði þeim m.a. kleift
að fara víðar yfir. Þessi nýja aðferð, að temja hesta,
breiddist svo út um víða veröld og skipti stórum í samgöngumálum
og útbreiðslu menningar frá einum stað til annars. Hesturinn var
einnig mjög vinsæll í hernaði og var strax talin mjög verðmætur.
Hann var tignaður víða og iðulega grafinn með húsbændum sínum,
einkum ef þeir voru höfðingjar eða konungar.
Landnámsmenn
komu með hesta með sér til landsins
fyrir um 1100 árum.
Síðan á 11. öld, hafa engin hross verið flutt til Íslands. Í
Íslendingasögunum kemur fram að hesturinn var
veldistákn
höfðingja en þar er einnig sagt frá
hestavígum
og
trúarhefð
er tengist hestum.
Uppruni íslenska hestsins
Íslenski
hesturinn kom til landsins með landnámsmönnunum í kringum 900
þ.e. fyrir u.þ.b. 1100 árum síðan. Landnámsmennirnir tóku með
sér hross frá heimabyggð sinni og hesturinn okkar er kominn af
þeim stofni, Nordlandhestinum, sem til var í Noregi á
víkingatímanum. Sjá nánar vefnum
History horse of the vikings.
Talið
er að fyrstu hross á landinu hafi verið úrval gæðinga, því
landnámsmenn hafa vafalaust tekið það besta með sér. Sumir
landnámsmenn höfðu viðkomu á Skotlandi áður en þeir komu til
Íslands og þar blönduðust hestarnir við skoska hesta. Þótt
ótrúlegt megi virðast þá hefur ekkert verið flutt af hestum til
Íslands frá 11 öld. Íslenska hrossakynið hefur því ræktast og
þróast án blöndunar við önnur kyn í 1000 ár.
Ef við
förum lengra aftur í tímann og rekjum uppruna norska stofnsins
þá kemur í ljós að hann er komin af hestakyni frá Asíu sem
kallast Mongólahests og er fjarskyldur Arabíska hestinum.
Íslenski hesturinn er fremur smár og aðeins þess vegna er hann
stundum talinn til smáhesta. Öll önnur atriði greina hann frá
smáhestum og má þá nefna getu hans og þol. Þúsund ára einangrun
íslenska hestsins hefur orðið til þess að hann hefur haldið
ýmsum þeim eiginleikum sem týndust hjá öðrum evrópskum
hestakynjum. Meðal þeirra eru
gangtegundirnar fimm
og fjölbreytni í
litum.
Fyrir utan fjölhæfni í gangi og fjölbreytni í litum eru
einnkenni íslenska hestsins að hann er óvenju sterkbyggður,
heilsuhraustur, þrautseigur og veðurþolinn. Hann er einnig mjög
fjölhæfur, gerir litlar kröfur til fóðurs og húsaskjóls, nær
háum aldri og hefur mjög einstaklingsbundin
persónuleika.
Íslenski
hesturinn til forna
Landnámsmennirnir fluttu ekki
einungis með sér hestinn heldur trúarhefðina sem fylgdi honum. Í
norrænum fornsögum kemur víða fram að menn lögðu mikla rækt við
hesta, hann var heilagt dýr, frjósemistákn og verndari
skáldskapar í norrænni goðafræði. Guðirnir áttu hesta sem voru
afbragð og nægir að nefna Sleipni reiðskjóta hins æðsta, Óðins,
sem var svo fótfrár að hann hafði átta fætur.
Hestum
var gert hátt undir höfði í heiðni og fórnað í blótum. Það var
bæði gert til blessunar fólksins sem blótið sóttu og eflingar
goða sem risu upp frá dauðum eftir blótið.
Eftir að kristni var lögtekin á
10. öld var bannað að borða hrossakjöt, það var talið ganga
glæpi næst að leggja sér það til munns. Margir dóu heldur úr
hungri en gera slíka ógæfu því að hver sem það gerði fór
vægðarlaust til helvítis. Þó voru einstaka fátæklingar sem
notuðu það til matar og hirtu ekki um hjátrúna en þeir voru oft
fyrirlitnir fyrir vikið og kallaðir hrossaketsætur og var hið
mesta skammyrði. Það var líka talað um hrossaketslykt af slíku
fólki og menn trúðu því að það yrði veiklulegra og skammlífara
en aðrir.
Í
Íslendingasögunum er víða rætt um hesta. Margar frásagnir eru af
glæsilegum hestum höfðingja, hann var veldistákn sem oftar en
ekki fylgdi með í gröfina altygjaður. Hestar voru taldir meðal
veglegustu gjafa og er þess víða getið að íslenskir gæðingar
hafi verið sendir frá Íslandi til Noregs og annarra landa sem
gjafir til konunga og fleiri fyrirmanna. Samkvæmt elstu lögbók
Íslands, Grágás, var skógargangssök að stela hesti þ.e.a.s.
algeran brottrekstur úr mannlegu samfélagi.
Í
Íslendingasögunum eru einnig frásagnir af hestavígum eða
svokölluðu hestaati. Þar sem hestar ganga saman úti er
vararsamt að hafa tvo graðhesta saman í stóði vegna baráttu
þeirra um hylli stóðmera. Forfeður okkar sviðsettu þessa
baráttu, létu tvo stóðhesta etja kapp saman samkvæmt ákveðnum
reglum og höfðu mikla skemmtun af. Oftast lauk hestavígum með
því að annar hesturinn lést í átökunum eða var mikið særður. Sá
sem bar sigur úr bítum fékk mikla sæmd fyrir vikið en sæmd og
virðing skipti stórum í samfélagi þess tíma.
|
|
|
Betra að dreyma |
|
Yfirleitt
þykir betra að dreyma ljósa hesta og albest séu þeir hvítir. Svartir
hestar eru óheillatákn. Dreymi ógifta stúlku að hún stígi á bak
stórum og fallegum hesti er það fyrir góðri giftingu. Hlaupandi
hestar eru fyrir einhverju fljótræði. Rauður hestur: ánægja og
skemmtanir. Leirljós: veikindi. Grjáskjóttur: slarksamt líf. Grár
hestur boðar gleði og gæfu. Jarpur er fyrir velgengni. Að járna hest
táknar erfiðleika sem dreymandinn er að fást við og bleikur hestur
boðar honum veikindi og mótlæti.
|
|
Nýtt
kennslumyndband |
|
Á hestbaki með Eyjólfi Ísólfssyni
Hólaskóli óskar Eyjólfi Ísólfssyni yfirreiðkennara skólans til
hamingju með nýtt og glæsilegt kennslumyndband sem kom út skömmu
fyrir helgi. Eyjólfur Ísólfsson hefur í nokkur ár unnið að gerð
kennslumyndbands um tamningu og þjálfun hesta. Myndbandið sem kom út
á dögunum er hið fyrsta í röðinni, um 50 mínútur að lengd. Eyjólfur
á efni í fleiri myndbönd sem stefnt er á að komi út í framhaldinu.
Þetta fyrsta myndband ber heitið “Á hestbaki, nokkur
grundvallaratriði”og fæst það með íslensku tali en mun síðar einnig
koma út á fleiri tungumálum. Það er verslunin Ástund sem sér um
dreifingu myndarinnar, en framleiðandi er Plúsfilm. Myndin hefur
hlotið bestu meðmæli Félags tamningamanna.
Sjá einnig frétt á Eiðfaxa-vefnum.
|
|
Áður voru
bílar ekki til á íslandi, |
|
Áður voru
engir bílar til á Íslandi. Þá ferðuðust íslendingar á hestum.
Íslensku hestarnir eru komnir frá hestum, sem víkingarnir tóku
með sér til Íslands fyrir ellefu hundruð árum. Þeir hafa ekki
blandast öðrum hestum.
Hestarnir voru áður notaðir til að smala fé, flytja hey og
vörur, en nú eru hestar á Íslandi mest notaðir sem reiðhestar
eða seldir til annarra landa.
Stundum
eru hestarnir látnir ganga úti allan veturinn. Það eru fá önnur
dýr sem geta lifað utanhúss á Íslandi allt árið. Þeir verða
loðnir á veturna, en missa feldinn á vorin. Þá þarf að kemba þá
og klippa faxið og taglið.
Það þarf
að temja hesta áður en þeir vilja bera hnakk og beisli og mann.
Íslenski hesturinn hefur fimm mismunandi ganga. Þeir heita
brokk, tölt, skeið, stökk og valhopp. Sumir hestar hafa svo
þýðan gang, að knapinn getur haldið á fullu glasi og það
skvettist ekkert úr því, þó hesturinn hlaupi hratt. En sumir
hestar geta verið hastir eða styggir.
Áður voru
engar brýr yfir árnar á Íslandi. Íslensku hestarnir hafa lært að
vaða og synda með mann á bakinu yfir hættuleg stórfljót, jafnvel
jökulár. Einn maður sagði frá: "Þú situr á hestinum úti í miðri
á. Þú sérð ekki botninn.því vatnið er leirugt jökulvatn. Botninn
er ójafn og vatnið er kalt. Ef þú dettur í ána, getur þú frosið
í hel. Það eru stórir ísjakar í ánni, sem geta rekist á hestinn
og þig. Hesturinn hikar og leitar að réttri leið með hófunum.
Allt í einu fer hann að synda með þig á bakinu. Þú getur ekkert
gert, það er bara hesturinn, sem veit hvað á að gera. Þú lokar
augunum og heldur þér fast í hnakkinn. Ískalt vatnið skolast
yfir ykkur. Eftir langa stund finnur hesturinn botn. Þið komið
að hinum bakkanum og gangið á þurrt."
Íslenskir
hestar geta næstum því klifrað. "Ég var 10 ára þegar ég fór á
hesti um fjallshlíð eftir mjóum stíg. Beint upp frá mér var
hundrað metra bjarg og annað eins beint niður. Stígurinn var
ójafn og á honum voru stórir steinar. Allt í einu gengur
hesurinn upp brekku. Og svo niður brattan halla. Ég lokaði
augunum. En hesturinn gekk eins og á gólfi."
Íslenski
hesturinn hefur bjargað lífum margra íslendinga í 1100 ár. Þeir
elska hestinn sinn. Það er sagt, að íslendingar yrki fleiri ljóð
um hestana sína en um konurnar sínar. Þeir vilja reyna að vernda
hestinn óbreyttan.
Það er bannað að flytja graðhesta út frá Íslandi. En í
Þýskalandi eru menn að reyna að rækta hesta með því að para
íslenskar hryssur með hestum frá öðrum löndum. Folöldin verða
notuð til að krossrækta falska íslenska hesta. |
|
|
Þróun hestsins. |
|
|
> Loka þessari vefsíðu <
|